Óskar Kárason

Óskar

Hjónin Anna Jesdóttir og Óskar Kárason.

Óskar Kárason fæddist 9. ágúst 1905 að Vesturholtum undir Vestur- Eyjafjöllum. Hann lést 2. maí 1970. Foreldrar hans voru Kári Sigurðsson, Presthúsum, og Þórunn Pálsdóttir. Kona Óskars var Anna Jesdóttir, fædd 2. desember 1902, og áttu þau þrjú börn; Ágústu, Kára og Þóri. Óskar byggði Sunnuhól sem var heimili fjölskyldunnar til ársins 1971.

Óskar tók skipstjórapróf á námskeiði í Vestmannaeyjum árið 1923. Hann lauk sveinsprófi í múrsmíði 1933 í Iðnskólanum í Reykjavík og tók nokkrum árum síðar landmælingapróf .

Óskar stundaði sjóinn á yngri árum, eða þar til hann útskrifaðist sem múrari. Hann vann við múrsmíði frá 1933 til 1954 og var hann fyrsti lærði múrarinn í Eyjum. Hann var byggingafulltrúi Vestmannaeyja frá 1938.

Mikinn þátt tók Óskar í félagsstarfi. Átti hann þátt í stofnun ýmissa félaga.

• Stofnaði Glímufélagið Framsókn árið 1922 og var formaður þess til 1925.
• Stofnandi Akóges árið 1923 og var formaður um skeið auk þess að vera oft í stjórn. Heiðursfélagi seinna.
• Stofnandi Múrarafélags Vestmannaeyja árið 1934 og formaður til 1939.
• Stofnandi félagsins Heimis árið 1939 og formaður til 1945.
• Aðalhvatamaður að stofnun Verkalýðsfélags Vestmannaeyja árið 1939 ásamt Elíasi Sigfússyni.
• Stofnandi Byggingameistarafélags Vestmannaeyja árið 1942 og formaður til 1954.
• Einn af stofnendum Bjargveiðifélags Vestmannaeyja árið 1951.
• Einn af stofnendum Rotaryklúbbs Vestmannaeyja 1955.
• Í stjórn Iðnaðarmannafélags Vestmannaeyja nokkur ár.
• Í Iðnráði Vestmannaeyja frá 1934, formaður frá 1949.

Formannavísurnar

Óskar er frægur fyrir vísurnar sem hann samdi um formenn Eyjanna. Hann gaf út tvö rit með samansafni af vísunum. Fyrsta safnið kom út árið 1950 og annað árið 1956. Allar formannavísurnar eru hér á vefnum og eru vísurnar tengdar viðeigandi formönnum.

Ef mér væri frjálsum falt

formenn um að dæma,

mannvalið eg mundi allt

medalíum sæma.

Óskar Kárason. Formannavísur. Vestmannaeyjum, 1950.

Frekari umfjöllun

Óskar Kárason múrarameistari, byggingafulltrúi frá Presthúsum fæddist 9. ágúst 1905 og lést 2. maí 1970.
Foreldrar hans voru Kári Sigurðsson bóndi í Presthúsum, f. 12. júlí 1880 í Selshjáleigu í V-Landeyjum, d. 10. ágúst 1925, og kona hans Þórunn Pálsdóttir húsfreyja, f. 12. nóvember 1879 í Vesturholtum u. Eyjafjöllum, d. 25. mars 1965 í Reykjavík.

Kona Óskars Kárasonar var Anna Jesdóttir, f. 2. desember 1902 að Eyvindarhólum undir Eyjafjöllum, d. 18. september 1994.

Börn Óskars og Önnu eru:
1. Ágústa, f. 3. febrúar 1930.
2. Kári, f. 25. júlí 1931.
3. Þórir, f. 19. september 1934.

Úr fórum Árna Árnasonar símritara:
Bjargveiðimannatal.
Óskar Kárason er lágur vexti, en þrekinn, skolhærður, breiðleitur, en ljós yfirlitum. Hann er léttur í skapi, en bregður þó fyrir nokkuð þungri skapgerðar framkomu, en yfirleitt kátur, og í sínum hóp er hann hrókur fagnaðar, ræðinn, fróður og skemmtilegur. Lætur fjúka í kviðlingum.
Hann var veiðimaður góður, en hefir nú dregist nokkuð aftur úr vegna þjálfunarskorts. Hann hefir verið í Elliðaey, Álsey og Hellisey og nokkuð á heimalandi.
Lífsstarf Óskars er múrverk, sem hann er meistari í og er nú byggingafulltrúi bæjarins. Óskar er hagmæltur vel og hefir gefið út eitt kver, „Formannavísur úr Eyjum“. Annað kver af formannavísum gaf hann út í apríl 1957, mest dróttkveðnar vísur og þungar. Hann var góður veiðimaður, kappsfullur og fylginn sér.

Úr fórum Árna Árnasonar, efnisyfirlit

---

Heimildir

• Samantekt: Víglundur Þór Þorsteinsson.
• Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.

Myndir

• 
• 
• 
• 
• 
• 
• 
• 
• 
• 
•