Sjómannadagsblað Vestmannaeyja 2004/ Bæjarlistamaður Vm. 2003 er sjómaður á frystitogara
Sjómaðurinn og tónlistamaðurinn, Ósvaldur Freyr Guðjónsson, var af Menningarmálanefnd Vestmannaeyja tilnefndur bæjarlistamaður Eyjanna árið 2003. Það er óhætt að segja að margir urðu undrandi þegar þessi heiðursnafnbót féll í hlut eins hásetans á frystitogaranum Vestmannaey VE 54. Sjómannastéttin og margir aðrir fögnuðu.
Árið 1997 útskrifaðist Obbi sem tónlistarkennari frá blásarakennaradeild Tónlistarskóla Reykjavíkur. Hann lærði þar aðallega á trompet sem er aðalhljóðfærið hans. Á það hefur hann leikið í Lúðrasveit Vestmannaeyja síðan 1976.
Á Vestmannaey hefur hann verið með hléum frá 1996. Talsvert verið við nám og kennslu á veturna en alfarið verið um borð síðasta árið. Hann byrjaði á sjó á Kap VE 4 áríð 1987 á sumarsíldveiðum og var þar áfram á loðnunni til vors 1988. Hann hefur á sjómannsferlinum verið víðar, m.a. á Heimaey,
Skúla fógeta o.fl. Pilturinn kann mjög vel við sig á sjónum, það á hann ekki langt að sækja. Ólafur Vigfússon (Óli Fúsa í Gíslholti) var föðurafi hans, mikill aflamaður og farsæll skipstjóri hér í Eyjum í fjöldamörg ár.
Á sjónum er Obbi með gítarinn og gutlar á hann, eins og hann segir, þegar næði gefst. Stundum syngja vélstjórarnir með honum og þegar vel liggur á karlinum, bætist hann og kokkurinn í hópinn. Frítíminn um borð er allt of lítill til útsetninga og annarra hugverka. Þó er hægt að grunnvinna þar ýmislegt og margar hugmyndir að lögum og textum hafa kviknað á sjónum. Gítarinn verður að vera við höndina ef hugmynd að lagi kviknar. Þær koma án nokkurs fyrirvara. Niðurstaðan er samt sú að það fer ekki vel saman að vera á sjónum og á fullu í tónlist. En hvoru tveggja togar í kappann.
Í fríum æfir hann og hefur haldið tónleika með hópi fólks. Þau kalla sig Obbó - síí. Leikið er á trommur, bassa, gítar og orgel og 4 syngja eingöngu. Obbi spilar á píanó og gítar og stjórnar öllu saman. Aðrir í hópnum eru: Hannes Friðbjarnarson, leikur á trommur, Högni Hilmisson á bassa, Karl Björnsson og Óskar Matthíasson á gítara, Páll Viðar Kristinsson og Þórir Ólafsson á hljómborð. Um söng sjá: Íris Guðmundsdóttir, Ragnhildur Magnúsdóttir, Sara Hamilton, Sævar Helgi Geirsson, Birkir Egilsson og Hafdís Kristjánsdóttir. Yfirleitt eru lögin melodískt popp sem Obbi hefur samið, bæði lög og texta og útsett. Obbó - síí hefur haldið þrenna tónleika í Höllinni fyrir fleiri en 500 manns. Þeir síðustu voru þar á sjómannadagskvöldið 2003. Það vekur upp þá spurningu hvort ekki þurfi að vekja aftur upp kvöldskemmtun sjómannadagsins, hún hefur ekki verið haldin í mörg ár en var mjög vinsæl á árum áður.
Þau hafa einnig verið mikilvirk í nokkrum kaffihúsamessum í Safnaðarheimili Landakirkju.
Og allt ætlaði um koll að keyra í Herjólfsdal á síðustu þjóðhátíð þar sem þau komu fram. Þjóðhátíðargestir fögnuðu þeim innilega. Öllum þessum tónleikum hefur verið mjög vel tekið, svo nafnbótin bæjarlistamaður Vestmannaeyja, er fullkomlega eðlileg og góð. Þarna er saman kominn hópur fólks, undir stjórn Obba, sem sannarlega hefur glatt bæjarbúa og aðra og gerir vonandi lengi enn.
Túrarnir á Vestmannaey eru venjulega 3 vikur og dvöl í landi milli þeirra um 4 dagar. Æfingar fyrir tónleika hafa liðið fyrir þessar fjarvistir að áliti Obba en hvað sem því líður, finnst flestum að tónleikar þeirra hafi tekist vel hverju sinni og aðdáendahópurinn er stór.
Það verður gaman að fylgjast með Obba og Obbó - síí. Vonandi verður hann með list sinni og hæfileikum, okkur til gleði mörg ókomin ár.
