Sjómannadagsblað Vestmannaeyja 2009/Norræna gulldepla, nýr nytjafiskur

Úr Heimaslóð, Sögusetri Vestmannaeyja
Útgáfa frá 2. desember 2019 kl. 13:27 eftir Valli (spjall | framlög) Útgáfa frá 2. desember 2019 kl. 13:27 eftir Valli (spjall | framlög)
(breyting) ←Fyrri útgáfa | Nýjasta útgáfa (breyting) | Næsta útgáfa→ (breyting)
Fara í flakk Fara í leit
ÞORBJÖRN VÍGLUNDSSON SKRIFAR


Norræna gulldepla, nýr nytjafiskur


Haustið 2008 fór Huginn VE 55 til kolmunnaleitar. Veiðum á Íslandssíldinni var lokið og var verið að leita að verkefnum fyrir skipið fram að loðnu. Þrátt fyrir mikla leit á stóru svæði fannst ekki kolmunni í veiðanlegu magni. Þeir rákust samt sem áður á miklar lóðningar suður af Eyjum og köstuðu trollinu í von um að þar leyndist kolmunninn. En eftir að þeir voru búnir að draga í talsverða stund í gegnum lóðið án þess að fá blikk á aflanema var híft. Pokinn reyndist tómur en neðst í honum voru nokkur örsmá kvikindi. Það reyndist vera hin smáa norræna gulldepla eftir nánari rannsókn en ekki var mikið af þeim í þetta skiptið enda voru þeir með kolmunnapokann undir og smaug allur fiskur út um hann.

Ómar Steinsson og Guðmundur Huginn Guðmundsson, skipstjórnendur á Hugin VE.

Það var því í kjölfarið ákveðið að láta rannsaka fiskinn með það í huga hvort hægt væri að nýta hann í bræðslu. Auk þess þurfti að breyta veiðarfærum til þess að geta veitt þennan smáa fisk.

Grímur Magnússon frá Felli.
Greinarhöfundur, Þorbjörn Víglundsson.

Það var svo í desember sem Huginn VE hélt í sína fyrstu gulldepluveiðiferð. Ekki varð mikill árangur af veiðiferðinni sem slíkri en þrátt fyrir að ekki hafi mikið fiskast þá öfluðu menn sér mikillar reynslu. Þeir slógu undir loðnupokanum í þetta skiptið en möskvarnir í honum reyndust vera of stórir fyrir þennan smáa fisk sem gulldeplan er. Það var því eytt tíma í að þróa veiðarfærin betur og eftir jól og áramót var farið af stað á ný. Nú fór að fiskast betur enda menn komnir með sérútbúna poka fyrir veiðarnar.
Í stuttu máli sagt þá fór alltaf að ganga betur og betur að veiða gulldepluna og tóku aðrar útgerðir að renna hýru auga til veiðanna enda engar loðnuveiðar hafnar og ekki gott útlitið í þeim efnum. Þegar mest var þá stunduðu þessar veiðar flest íslensk uppsjávarveiðiskip en fljótlega um mánaðamótin janúar-febrúar fór að draga úr veiðunum. Megninu af aflanum var landað hér í Eyjum og stoppaði það vissulega í það gat sem loönuleysið hafði myndað. Heildarafli gulldeplu var tæp 39.000 tonn og var Huginn VE aflahæstur yfir landið með um 6.400 tonn. Alls var landað tæpum 19.000 tonnum af gulldeplu hér í Eyjum.
Alls fiskuðu skip frá Vestmannaeyjum 13.480 tonn og skiptist það á þessa leið:
Huginn VE 55 6380 tonn.
Álsey VE2 1400 tonn.
Guðmundur VE 29 1000 tonn.
Júpiter ÞH 2300 tonn.
Sighvatur Bjarnason VE 81 1000 tonn.
Kap VE 4 1400 tonn.
Aflatölur: Fiskistofa.is
Menn eru almennt bjartsýnir á að framhald verði á veiðunum á þessu ári en lítið er vitað um gönguferli gulldeplunar. Spá menn því að hægt verði að byrja að veiða gulldeplu á ný seint nú í sumar eða snemma að hausti. Togaraskipstjórar hafa oft á tíðum orðið varir við gulldeplu úti fyrir allri suðurströndinni og gefur það mönnum vonir um að enn meira verði hægt að veiða þegar þessar veiðar verða reyndar að nýju.

Þorbjörn Víglundsson


Sigurbjörn Árnason og Sindri Grétarsson, skipverjar á Hugin VE.