Pétur Andersen
Hans Pétur (Peder) Andersen, Sólbakka, fæddist 30. mars 1887 í Fredrikssundi í Danmörku og lést 6. apríl árið 1955. Foreldrar hans voru Carl Willum Andersen og Juliana Kristine Poulsen Andersen. Hans Peder var jafnan kallaður Danski-Pétur.
Pétur kom til Vestmannaeyja 1907 og varð fljótlega eftirsóttur vélamaður því hann hafði meiri kunnáttu í þeim geira en flestir í þá daga. Hann var vélamaður á Friðþjófi 1907 hjá Friðriki Svipmundssyni og svo á Lunda I 1909-1911 hjá Guðleifi Elíssyni á Brúnum, varð þá formaður með Lunda I 1912-1920. Þá keypti hann Skógafoss 1921-1926, sem hann átti 2/5. parta í. Fjórir synir Péturs, þeir Willum, Knud, Emil og Jóhann urðu skipstjórar, en Njáll vélsmíðameistari. Þeir bræður áttu allir hluti í útgerðum.
Pétur var aflakóngur árið 1924.
Fjölskylda
Fyrri kona Péturs var Jóhanna Guðjónsdóttir. Þau áttu 6 börn: Valgerði Ólafíu Evu, Willum Jörgen, Knud Kristján, Njál, Emil Martein og Guðrún Svanlaug. Jóhanna lést árið 1934.
Pétur kvæntist á ný. Seinni kona hans var Magnea Jónsdóttir. Þau eignuðust börnin Jóhann Júlíus, Valgerði og dreng sem lést í vöggu.
Myndir
Heimildir
- Agnes Valdimarsdóttir. Andersen ættin - ættfræðisíða [1]
- Sjómannablaðið Víkingur. Farmanna- og Fiskimannasamband Íslands.
- Gísli Eyjólfsson frá Bessastöðum