Hilmar Bernótus Þórarinsson
Hilmar Bernótus Þórarinsson rafvirkjameistari og framkvæmdastjóri í Njarðvík og síðast að Brekkubyggð 30 í Garðabæ fæddist 8. desember 1929 í Vestra-Stakkagerði og lést 14. júní 1992.
Foreldrar hans voru Þórarinn Bernótusson vélstjóri frá Vestra-Stakkagerði, f. 20. maí 1909, d. 10. ágúst 1943, og fyrsta kona hans Guðrún Rafnsdóttir húsfreyja, f. 22. mars 1910, d. 25. október 2004.
Fósturforeldrar Hilmars voru Árni Þórarinsson hafnsögumaður, f. 25. maí 1896, d. 18. janúar 1982, og kona hans Guðbjörg Þórðardóttir ömmusystir Hilmars, húsfreyja, f. 31. ágúst 1894, d. 4. desember 1984.
Hilmar var með foreldrum sínum í fyrstu en þau skildu og hann fór í fóstur til Guðbjargar og Árna að Fífilgötu 3.
Hann lauk miðskólaprófi í Gagnfræðaskólanum 1946, nam rafvirkjun við Iðnskólann í Keflavík, lauk sveinsprófi 1951. Meistari hans var Júlíus Steingrímsson.
Hann fluttist í Ytri-Njarðvík með fósturforeldrum sínum 1948.
Hilmar var framkvæmdastjóri Rafmagnsverktaka í Keflavík frá 1961, sat í stjórn Rafverktakafélags Suðurnesja í átta ár, þar af formaður í þrjú ár. Hann sat í hreppsnefnd og bæjarstjórn Njarðvíkur 1966-1982, að einu ári undanskildu. Forseti bæjarstjórnar var hann 1978-1980, í bæjarráði 1977-1982.
Þau Valgerður eignuðust fjögur börn, bjuggu í Njarðvík, síðar í Garðabæ.
I. Kona Hilmars Bernótusar er Valgerður Guðrún Valdimarsdóttir húsfreyja, nú á Nesvöllum í Reykjanesbæ, f. 29. ágúst 1932. Foreldrar hennar voru Tryggvi Valdimar Kristófersson bóndi, f. 7. október 1903 á Hellnum á Snæfellsnesi, d. 29. ágúst 1969, og kona hans Guðmunda Kristín Júlíusdóttir húsfreyja, f. 10. maí 1907 á Hólslandi í Eyjahreppi í Hnapp., d. 12. febrúar 1995.
Börn þeirra:
1. Árni Þór Hilmarsson félagsmálafulltrúi, gæðastjóri Kópavogsbæjar, f. 2. júní 1954. Fyrrum kona hans Jenný Ederezinghe. Fyrrum kona hans Ingunn Sigurgeirsdóttir. Sambýliskona Guðrún Snorradóttir.
2. Kristín Hilmarsdóttir viðskipta- og hagfræðingur, fjármálastjóri Garðabæjar, f. 7. júlí 1955, ógift.
3. Hilda Hilmarsdóttir heimilishagfræðingur, kennari í Bandaríkjunum, f. 19. september 1958, d. 22. mars 2020. Fyrrum maður hennar Todd Schroeckenthaler.
4. Hjördís Hilmarsdóttir hárgreiðslumeistari, f. 17. janúar 1963. Maður hennar Valur Ketilsson.
Heimildir
- Samantekt: Víglundur Þór Þorsteinsson.
- Íslendingabók.is.
- Kristín.
- Manntöl.
- Prestþjónustubækur.
- Rafvirkjatal. Ritstjóri: Þorsteinn Jónsson, Gunnar Guðmundsson og fleiri. Þjóðsaga hf. 1995.
Þessi grein tilheyrir Æviskrám Eyjafólks eftir Víglund Þór Þorsteinsson.