Guðrún Erlendsdóttir (Vesturhúsum)
Guðrún Erlendsdóttir húsfreyja á Vesturhúsum fæddist 1. febrúar 1841 í Stóradalssókn undir Eyjafjöllum og lést 14. júní 1921.
Faðir Guðrúnar var Erlendur bóndi á Borgareyrum þar, f. 7. mars 1805 í Krosssókn í A-Landeyjum, d. 10. júní 1851, Höskuldsson bónda í Krosshjáleigu (nú Kross II) í A-Landeyjum, f. 1778 þar, d. 28. apríl 1818, drukknaði, Erlendssonar bónda í Álftarhóli, f. 1738, d. 9. febrúar 1786, Höskuldssonar og konu Erlendar Höskuldssonar, Marínar húsfreyju, f. 1743, d. 7. febrúar 1805, Sigmundsdóttur.
Móðir Erlendar Höskuldssonar á Borgareyrum og fyrri kona Höskuldar í Krosshjáleigu var Guðrún húsfreyja, f. 1776, d. 18. mars 1810, Einarsdóttir bónda í Drangshlíð undir Eyjafjöllum og Kanastöðum í Landeyjum, f. 30. janúar 1747, á lífi 1813, Einarssonar,
Hallssonar, og fyrri konu Einars Einarssonar í Drangshlíð, sem er óþekkt. Seinni kona hans var Anna Vigfúsdóttir móðir Auðbjargar (Iðbjargar) langömmu Guðmundar Þórarinssonar manns Guðrúnar Erlendsdóttur.
Móðir Guðrúnar á Vesturhúsum var Þórdís húsfreyja á Borgareyrum, áður á Vilborgarstöðum, Gjábakka og Stóru-Hildisey, f. 1800 á Vilborgarstöðum, d. 29. nóvember 1855 í Stóra-Dalssókn undir Eyjafjöllum, Magnúsdóttir bónda á Vilborgarstöðum 1801 og 1816, ekkli á Borgareyrum undir Eyjafjöllum 1845, f. 1771, d. 2. ágúst 1846 í Stóra-Dalssókn, Jónssonar í Gvendarhúsi Einarssonar og konu Jóns Einarssonar, Margrétar Brandsdóttur.
Kona Magnúsar á Vilborgarstöðum og móðir Þórdísar var Herborg Helgadóttir og móðir Herborgar var Guðríður Sveinsdóttir.
Guðrún Erlendsdóttir á Vesturhúsum var systir Guðmundar Erlendssonar hafnsögumanns í London og Þorgerðar Erlendsdóttur á Fögruvöllum, konu Sigurðar Vigfússonar.
Hún var líka hálfsystir, (af sömu móður), Guðríðar Guðmundsdóttur í Grímshjalli, konu Hannesar Gíslasonar, en þau voru foreldrar Andríu Hannesdóttur móður Hjálmars Ísakssonar skipasmiðs í Kuðungi.
Guðrún var með foreldrum sínum á Borgareyrum u. Eyjafjöllum 1845 og 1850. Við manntal 1855 var hún léttastúlka í Dalseli þar og þar var ekkjan móðir hennar húskona (dó á því ári).
Hún var vinnukona hjá Matthildi Magnúsdóttur og Þorsteini Jónssyni héraðslækni í Landlyst 1870.
Við manntal 1890 var hún húsfreyja á Vesturhúsum með eiginmanni, þrem börnum þeirra, Margréti Hafliðadóttur móður Guðmundar og niðursetningnum Helgu Þorláksdóttur, ekkju, 85 ára. Hún var líklega fyrrv. húsfreyja á Kirkjubæ og húsmóðir Guðmundar Þórarinssonar, er hann kom fyrst til dvalar í Eyjum. Hún var kona Sveins Sveinssonar bónda á Kirkjubæ.
1910 var Guðrún á Vesturhúsum með Guðmundi og Margréti tengdamóður sinni.
Tvö fósturbörn voru hjá þeim: Guðmundur Jóelsson Eyjólfssonar, dótturbarn þeirra 4 ára og Oddrós Anna Sigríður Oddsdóttir á Oddsstöðum Árnasonar Þórarinssonar 13 ára. Oddrós var hálfsystir Árna á Burstafelli.
Við manntal 1920 var Guðrún ekkja hjá dóttur sinni Guðleifu í Holti.
Maður Guðrúnar á Vesturhúsum, (18. okt. 1872), var Guðmundur Þórarinsson útvegsbóndi á Vesturhúsum, f. 28. des. 1850, d. 13. marz 1916, drukknaði við Álsey.
Börn Guðmundar og Guðrúnar voru:
1. Guðleif, kona Vigfúsar í Holti.
2. Magnús, kvæntur Jórunni Hannesdóttur.
3. Halla, gift Guðjóni Eyjólfssyni.
4. Þórdís, gift Jóel Eyjólfssyni.
Tvö fósturbörn þeirra:
5. Guðmundur Jóelsson.
6. Oddrós Anna Sigríður Oddsdóttir.
Sjá nánar Blik 1969: Vesturhúsafeðgarnir.
Heimildir
- Samantekt: Víglundur Þór Þorsteinsson.
- Árni Árnason.
- Landeyingabók – Austur-Landeyjar. Valgeir Sigurðsson og fleiri. Ritstjóri: Ragnar Böðvarsson. Austur-Landeyjahreppur, Gunnarshólma 1999.
- Blik 1969: Vesturhúsafeðgarnir.
- Manntöl.
- Íslendingabók.is.
Þessi grein tilheyrir Æviskrám Eyjafólks eftir Víglund Þór Þorsteinsson.