Elín Halldórsdóttir (Landagötu)
Elín Halldórsdóttir húsfreyja fæddist 9. ágúst 1898 á Álftarhóli í A-Landeyjum og lést 30. október 1969.
Faðir hennar var Halldór bóndi á Álftarhóli, síðan á Búðarhóli í A-Landeyjum, f. 27. ágúst 1858 í Búðarhólshjáleigu, d. 15. janúar 1914 á Búðarhóli, Guðmundsson bónda á Kúfhóli, en lengst í Skíðbakkahjáleigu 1860-1897, f. 23. apríl 1832 á Kúfhóli, d. 9. janúar 1900 í Skíðbakkahjáleigu, Halldórssonar bónda á Kúfhóli, f. 5. desember 1793, d. 5. júní 1860, Guðmundssonar, og fyrri konu Halldórs, (11. júlí 1818), Salvarar húsfreyju, f. 10. ágúst 1795 í Skipagerði, d. 5. ágúst 1839 á Kúfhóli, Brynjólfsdóttur.
Móðir Halldórs á Álftarhóli og kona Guðmundar á Kúfhóli var Elín húsfreyja, f. 25. mars 1832 í Austur-Búðarhólshjáleigu (nú Hólavatn), d. 14. janúar 1897, Sigurðardóttir bónda þar, f. 24. júlí 1807, d. 8. júní 1873 í Skíðbakkahjáleigu, Eyjólfssonar, og konu Sigurðar, (16. október 1829), Guðnýjar húsfreyju, f. 10. júlí 1809, d. 11. febrúar 1889, Magnúsdóttur.
Móðir Elínar Halldórsdóttur og bústýra Halldórs á Álftarhóli var Ingveldur húsfreyja, f. 20. nóvember 1859 í Strandarhjáleigu í Landeyjum, d. 8. október 1944 á Vilborgarstöðum, Nikulásdóttir bónda í Krosshjáleigu (nú Kross II), f. 5. maí 1833 á Skækli (nú Guðnastaðir) í A-Landeyjum, d. 9. mars 1889 í Krosshjáleigu, Árnasonar bónda í Rimakoti, f. 5. ágúst 1803 á Skækli, d. 12. janúar 1854 í Rimakoti, Pálssonar, og fyrri konu Árna, (30. október 1829), Ingveldar húsfreyju, f. 29. september 1806 á Núpi u. Eyjafjöllum, d. 6. ágúst 1843 í Rimakoti, Ormsdóttur.
(Sjá Óskar P. Einarsson til að sjá ætt Árna Pálssonar og Ingveldar Ormsdóttur í Eyjum).
Móðir Ingveldar í Álftarhóli og kona Nikulásar í Krosshjáleigu var, (17. október 1861), Oddný húsfreyja, f. 20. apríl 1837 Gunnlaugsdóttir bónda og formanns í Litlu-Hildisey, f. 28. ágúst 1804 á Bryggjum í A-Landeyjum, d. 21. nóvember 1884, Einarssonar, og konu Gunnlaugs, (30. ágúst 1829), Guðríðar húsfreyju, f. 11. nóvember 1807, d. 12. júní 1900, Magnúsdóttur.
Elín var húsfreyja í Birtingarholti, Víðidal og að Landagötu 16.
1928 fluttust þau Ágúst til Stóru-Breiðavíkur við Reyðarfjörð og gerðu út þaðan og frá Vöðlavík. Vegna veikinda Ágústs fluttust þau aftur til Eyja 1940.
Auk heimilisstarfa stundaði Elín þvotta fyrir fólk í bænum.
Elín var systir Oddnýjar Halldórsdóttur húsfreyju, konu Jóns Bjarnasonar í Sigtúni, og Nikólínu Halldórsdóttur húsfreyju á Vilborgarstðum, konu Jóhanns Schevings.
Maður Elínar var Ágúst Sigfússon verslunarmaður og gæslumaður á leikvellinum á Péturstúni, f. 13. september 1896, d. 11. desember 1983.
Börn Elínar og Ágústs:
1. Björg Ágústsdóttir húsfreyja, f. 18. ágúst 1923, d. 30. september 2005, kona Sigurgeirs Kristjánssonar yfirlögregluþjóns, síðar forstjóra.
2. Halldór Ágústsson vélstjóri, formaður, f. 26. október 1926 í Víðidal, d. 9. janúar 1957, tók út af vb. Maí. Hann var kvæntur Guðbjörgu Sigurjónsdóttur frá Víðidal, f. 29. desember 1921, d. 1. maí 1912.
3. Jóhann Ágústsson kaupsýslumaður, f. 18. september 1932 í Stóru-Breiðavík við Reyðarfjörð, kvæntur Þóru Stefánsdóttur húsfreyju, f. 23. maí 1936.
Heimildir
- Samantekt: Víglundur Þór Þorsteinsson.
- Landeyingabók – Austur-Landeyjar. Valgeir Sigurðsson og fleiri. Ritstjóri: Ragnar Böðvarsson. Austur-Landeyjahreppur, Gunnarshólma 1999.
- Jóhann Ágústsson.
- Guðbjörg Sigurgeirsdóttir.
- Manntöl.
- Íslendingabók.is.
Þessi grein tilheyrir Æviskrám Eyjafólks eftir Víglund Þór Þorsteinsson.
Fólk í heyskap á túni Jóhanns Scheving og Nikólínu Halldórsdóttur á Vilborgarstöðum. Túnið var sunnan við Landagötu. Síðar voru byggð þarna húsin nr. 1, 3 og 5 við Grænuhlíð.
Þarna má sjá lengst t.v. Skjaldbreið, Lönd-mið, þá er lágreist hús, Hóllinn, en þar bjó einu sinni Óskar Ólafsson pípulagningamaður. Þá er Gíslholt og við hlið þess er Skálholt við Landagötu.
Gamla konan t.v. er líklega móðir þeirra Nikólínu og Elínar Halldórsdætra, Ingveldur Nikulásdóttir, d. 1944 í Eyjum, en fyrir framan hana er Perla Björnsdóttir frá Bólstaðarhlíð, þá Nikólína Halldórsdóttir og maður hennar Jóhann Scheving, en þau bjuggu á Vestri Vilborgarstöðum. Að baki Jóhanns standa tvær stúlkur, þær Guðrún Guðmundsdóttir frá Presthúsum, f. 1937, og Halla Sigurðardóttir frá Svanhól, f. 1936.
Ungi pilturinn við hlið Jóhanns er Jóhann Ágústsson, f. 1932, Sigfússonar, síðar gæslumanns á leikvellinum á Péturstúni („Pétó“).
Fremst á myndinni er Fríða í Bólstaðarhlíð, síðar kona Sigursteins Marinóssonar og að baki henni situr Elín Halldórsdóttir kona Ágústs Sigfússonar, systir Nikólínu.
Ætli myndin sé ekki tekin um 1942.
