Þorsteinn Ólafsson (Háagarði)
Þorsteinn Ólafsson sjómaður, bóndi, útgerðarmaður í Háagarði og á Kirkjubæ fæddist 16. október 1859 á Ketilsstöðum í Mýrdal og lést 31. desember 1939.
Foreldrar hans voru Ólafur Ólafsson bóndi á Ketilsstöðum og víðar, f. 28. desember 1828, og fyrri kona hans Helga Þorsteinsdóttir húsfreyja, f. 7. nóvember 1831, d. 2. febrúar 1869.
Þorsteinn var með foreldrum sínum á Ketilsstöðum til 1875, var smali á Geirlandi á Síðu 1875-1876, vinnumaður í Fjósum og Neðri-Dal í Mýrdal á bilinu 1876-1887. Hann var í Eyjum 1887-1888, vinnumaður á Dyrhólum í Mýrdal 1888-1893, á Norður-Hvoli 1893-1894, á Felli þar 1894-1896, á Stóru-Heiði þar 1896-1897.
Hann fór að Brekkum á Rangárvöllum 1897, giftist Ingibjörgu á því ári. Þau héldu frá Brekkum til Eyja 1898.
Guðleif Helga fæddist þeim 1898.
Þau bjuggu á Ofanleiti 1898, í Péturshúsi hjá Önnu Valgerði ljósmóður og Pétri Péturssyni 1901.
Þau voru komin að Háagarði 1906. Þar voru Loftur Jónsson fósturbarn þeirra og Hjörleifur tengdafaðir Þorsteins með þeim auk Helgu dóttur þeirra.
Jón Eyjólfsson á Kirkjubæ faðir Lofts drukknaði 1901, er Loftur var 10 ára. Sigríður móðir hans var heilsuveil. Heimilið var leyst upp og hún dó 1902.
Skyldleiki var milli Ingibjargar og Lofts; Ingibjörg móðir Jóns föður Lofts og Hjörleifur faðir Ingibjargar Hjörleifsdóttur voru systkini.
Loftur ólst síðan upp í Háagarði, varð beitningarmaður á Haffara, sem Þorsteinn fóstri hans var hlutareigandi að.
Þegar þau Loftur og Ágústína giftu sig 1913, byrjuðu þau búskap sinn hjá hjónunum í Háagarði.
Ólafur Ragnar Jónsson kom að Háagarði 1913 og var þá skráður tökubarn, en fóstursonur 1920. Hann var hálfsystursonur Þorsteins, sonur Hugborgar Helgu Ólafsdóttur.
1918 voru þau Þorsteinn enn í Háagarði. Þar voru einnig Þorbjörn Guðjónsson og Helga dóttir þeirra. Þau giftu sig á árinu. Þorbjörn og Helga fengu byggingu fyrir Austasta Hlaðbæ, (Suðurbænum) 1919 og þau Þorsteinn fluttust þangað og bjuggu þar síðan.
Þau voru eigendur að einum sjötta hluta í Haffara VE-116, en hann fórst við Flúðartanga 9. apríl 1916, áttu einn fimmta hlut í Happasæl VE-162 með Þorbirni Guðjónssyni um hríð.
Þau fluttust að Kirkjubæ 1919 og voru bændur þar til dd.
Þau létust bæði 1939.
Kona Þorsteins, (13. október 1897), var Ingibjörg Hjörleifsdóttir húsfreyja, f. 27. júlí 1863, d. 28. júlí 1939.
Barn þeirra var:
1. Guðleif Helga Þorsteinsdóttir húsfreyja á Kirkjubæ, f. 22. september 1898, d. 28. júlí 1975.
Fósturbörn þeirra voru:
2. Loftur Jónsson útvegsbóndi á Vilborgarstöðum, f. 13. júlí 1891, d. 2. maí 1981.
3. Ólafur R. Jónsson sjómaður í Vesturholti, f. 11. ágúst 1903, d. 4. nóvember 1979.
Heimildir
- Samantekt: Víglundur Þór Þorsteinsson.
- Blik 1971, Hjónin á Kirkjubæ, Helga og Þorbjörn.
- Manntöl.
- Minningargrein í Morgunblaðinu 9. maí 1981. Loftur Jónsson eftir Guðjón Ármann Eyjólfsson og Eyjólf Gíslason.
- Prestþjónustubækur.
- Vestur-Skaftfellingar 1703-1966. Björn Magnússon. Leiftur 1970-1973.
Þessi grein tilheyrir Æviskrám Eyjafólks eftir Víglund Þór Þorsteinsson.