Sjómannadagsblað Vestmannaeyja 2010/Þitt val - Þín leið
Með tilkomu endurskoðunar kjarasamninga árið 2005 var farið af stað með verkefni sem kallast Þitt val - Þín leið, Náms og starfsráðgjöf á vinnustað. Um er að ræða samstarfsverkefni Menntamálaráðuneytisins, Fræðslumiðstöðvar Atvinnulífsins, Samtaka Atvinnulífsins, ASÍ og símenntunarmiðstöðva um landið. Náms- og starfsráðgjafar á símenntunarmiðstöðvum um land allt hafa farið á vinnustaði til að vekja athygli á þessu verkefni, en erfitt hefur reynst að ná til sjómanna. Mér datt þá í hug að hægt væri að ná til sjómanna með því að setja kynningu á verkefninu á mynddisk sem yrði sýndur um borð í bátunum. Ég hef undanfarið unnið að þessu verkefni og er kynningin nú tilbúin. Sjómennt styrkti þetta verkefni ásamt Fræðslumiðstöð Atvinnulífsins, LIÚ og Visku- Fræðslu- og símenntunarmiðstöð Vestmannaeyja.
Í þessari kynningu er vakin athygli sjómanna á ókeypis ráðgjöf sem þeim stendur til boða um nám og störf á öllum fræðslu- og símenntunarmiðstöðvum landsins. Jafnframt er þar hvatning til sjómanna um að huga að sínum starfsferli, staldra við og skoða námsmöguleika. Á diskinum er að finna almennar upplýsingar út á hvað náms- og starfsráðgjöf gengur. Þá eru viðtöl við sjómenn sem hafa farið í nám samhliða störfum sínum. Þar segja þeir frá sínum kringumstæðum, hvernig námið hafi gengið og stöðu sinni í dag. Fræðslusjóður sjómanna, Sjómennt, er kynntur og upplýsingar veittar um staðsetningu símenntunarmiðstöðva um landið þannig að sjómenn ættu að geta pantað ráðgjöf hvar sem þeir landa hverju sinni.
Símenntunarmiðstöðvar um land allt hafa tekið að sér að dreifa diskinum í alla stærri báta og togara á landinu og er það nú í gangi. Einnig er stefnt að því að bjóða sjómönnum á smærri bátum á kynningu í landi. Ahugasamir geta einnig horft á vefútgáfu af kynningunni á http://viskave.is/.
Það er von mín að þessi kynning verði til þess að sjómenn nýti sér tilboð um ráðgjöf og skoði þá námsmöguleika sem eru í boði því þegar allt kemur til alls þá er starfið eitt af mikilvægustu þáttum í lífi hvers manns og því vert að huga vel að því.
Með bestu kveðju
Sólrún Bergþórsdóttir
Náms- og starfsráðgjafi
(Starfar í Visku Frœðslu- og símenntunarmiðstöð Vestm.
og Framhaldsskólanum í Vestmannaeyjum)