Sjómannadagsblað Vestmannaeyja 1996/ Kinn h.f. heldur veislu í vinnslusalnum
Á milli jóla og nýárs buðu eigendur fiskverkunarinnar Kinnar hf., Ástvaldur Valtýsson og fjölskylda, starfsfólki og viðskiptavinum til matarveislu í vinnslusal fyrirtækisins. Þar var komið fyrir stólum og borðum við hlið fiskvinnsluvélanna.
Grímur Gíslason matreiðslumaður, sem er einn af eigendum, sá um matreiðsluna. Hlaðborðið var hið veglegasta og samanstóð af reyktum ufsa með piparrótarsósu, djúpsteiktum blálöngubollum með beikoni og ostafyllingu, djúpsteiktum saltfiskroðum, kryddlegnum smáufsa með rækjum, pönnusteiktum kinnfisk með rjómasósu, djúpsteiktum saltfisk með rifsberjahlaupi, saltfiskpizzu og beikonvafinni keilu. Matnum var skolað niður með drykkjarföngum kældum í fiskikari fylltu með ís. Maturinn var snæddur undir gítar og harmónikkuleik. Eftir matinn var svo tekið lagið og sungið fram eftir kvöldi. Grímur og Ástvaldur Valtýsson vildu með þessari veislu sýna brot af því sem hægt væri að vinna úr framleiðslu fyrirtækisins.
Það er skoðun margra að framtíð okkar hér í Vestmannaeyjum byggist einmitt á því að nýta betur fiskinn sem við veiðum og vinna hann meira í pakkningar beint á borð neytandans.
Myndirnar, sem fylgja hér með, eru teknar í umræddri veislu í Kinn hf.