Sjómannadagsblað Vestmannaeyja 1974/ Aflakóngur Vestmannaeyja 1973
Aflakóngur Vestmannaeyja árið 1973 varð Gunnar Jónsson skipstjóri á Ísleifi VE 63. Fór sem margan grunaði, er hann var kynntur á síðum blaðsins árið 1972, að Gunnar kæmi þar bráðlega við sögu aftur.
Ísleifur VE 63 undir skipstjórn Gunnars var með mesta aflaverðmæti Vestmannaeyjabáta árið 1973 eða samtals 38.758.489 kr. brúttó, en nettó aflaverðmæti til skipta var kr. 31.327.639 kr. Þessi munur er vegna innflutningsgjalda, sem eru tekin af brúttóaflaverðmæti.
Á vetrarvertíðinni 1973 voru þeir á loðnuveiðum, og síðan á netum. Ísleifur hóf veiðar eftir að eldgosið hófst, er vika var af febrúar og aflaði samtals 7.200 tonn af loðnu. Þeir lönduðu talsverðum hluta af afla sínum í Eyjum, en vertíðina 1973 var loðnumóttaka þar þrátt fyrir gosið frá 16. febrúar og til loka loðnuvertíðar. Bolfiskaflinn var 150 tonn í net.
Báturinn hélt til síldveiða í Norðursjó í byrjun júní í fyrra og var afli ágætur allt sumarið. Verðmæti síldaraflans var 21.200 millj. kr. Ísleifur landaði eins og flestir íslenzku síldveiðibátarnir í síldarbænum Hirtshals á vesturströnd Jótlands.
Ég hitti Gunnar að máli stutta stund í glæsilegu einbýlishúsi þeirra hjóna við Illugagötu. Þeir sátu þar kunningjarnir, Gunnar og Jón Berg skipstjóri á Ísleifi IV, og ræddu horfur á komandi sumri, en haldið var til síldveiða i Norðursjó stuttu eftir sjómannadaginn, um miðjan júní. Þeir taka fjölskyldur sínar með sér og eru búsettir í Hirtshals yfir sumarið, var svo einnig í fyrra. Þykir konunum þetta góð tilbreyting og útivistin verður styttri.
Vestmannaeyingar óska Gunnari Jónssyni og skipshöfn á Ísleifi, útgerð og fjölskyldum til hamingju með aflasælt ár og allra heilla og farsældar á komandi árum.
.