Ritverk Árna Árnasonar/Hlöðver Johnsen

From Heimaslóð
Jump to: navigation, search
Hlöðver Johnsen í Bjarnarey.
Hlðver.

Kynning.

Jón Hlöðver Árnason Johnsen frá Suðurgarði fæddist 11. febrúar 1919 og lést 10. júlí 1997.
Foreldrar hans voru Árni Hálfdán Johnsen frá Frydendal, f. 13. október 1892, d. 15. apríl 1963, og kona hans Margrét Marta Johnsen frá Suðurgarði, f. 5. mars 1895 á Kirkjulandi í A-Landeyjum, d. 15. maí 1948.

Kona Hlöðvers var Sigríður Haraldsdóttir, f. 29. júní 1916 að Strandbergi, d. 17. febrúar 1993.

Börn Hlöðvers og Sigríðar eru:
Margrét, f. 7. nóvember 1942.
Sigríður, f. 28. júlí 1948.
Anna Svala, f. 3. janúar 1955.
Haraldur, f. 24. júlí 1956.
Svava Björk, f. 7. ágúst 1959.
Fósturdóttir Hlöðvers og dóttir Sigríðar er Ágústa Guðmundsdóttir, f. 5. janúar 1936, kona Guðna Pálssonar frá Þingholti. Faðir hennar var Guðmundur Óskar Ólafsson Lárussonar, f. 14. júní 1914, d. 18. mars 1981.

Úr fórum Árna Árnasonar símritara:
Bjargveiðimannatal.

Hlöðver er maður í hærra lagi og samsvarar sér vel, en fremur magur hin síðari ár vegna lasleika. Hann er dökkhærður (skol), en ljós í andliti, fríður í andliti og sviphreinn, léttur á velli og skapléttur, prúður og stilltur í umgengni, broshýr og kátur. Hann er úræðagóður og prýðis félagi, söngvinn og veitull, góður heim að sækja.
Hlöðver hefir aðallega verið til lundaveiða í Bjarnarey, en var þó líka í Álsey til viðlegu. Hann hefir verið mjög mikið við alls konar fuglaveiðar og bjarggöngur og getið sér góðan orðstír meðfélaga sinna, sem duglegur í hvívetna við bjarggöngur og prýðilega góður veiðimaður á lunda og sigmaður.
Bjargmaður er hann ágætur, snar og gætinn og hvarvetna afbragðs liðsmaður. Hann hefir verið mjög við eggja- og fuglatekju, ágætur veiðimaður og talinn í fremstu röð nútíma veiðimanna.
Í sambandi við veru Hlöðvers í Álsey, má geta þess að kona hans Sigríður lá við í eynni með veiðimönnunum. Vann hún að matargerðinni og var þetta þægilegt og vel þegið af veiðimönnunum. En slíkar kvenmanns-viðlegur eru nýtt fyrirbrigði í sögu úteyjaviðlegu, en hefir þó ekki náð neinni útbreiðslu þrátt fyrir þægilegheitin við húslega hjálp þeirra.
Lífsstarf hans hefir verið sjómennska, verslunarstörf og nú bankaritari hér í bæ. Hann er vellátinn og vinmargur sem hann á ættir til og drengur hinn besti. Hann er Bjarnareyingur af lífi og sál, þótt víðar hafi hann verið.
Hann er ritari Bjargveiðimannafélagsins.

Önnur umfjöllun á Heimaslóð: Hlöðver Johnsen


Úr fórum Árna Árnasonar, efnisyfirlit


Heimildir


Þessi grein tilheyrir Æviskrám Eyjafólks eftir Víglund Þór Þorsteinsson.