Páll Ingibergsson (Hjálmholti)

Úr Heimaslóð, Sögusetri Vestmannaeyja
Fara í flakk Fara í leit
Páll í Hjálmholti

Páll Ingibergsson fæddist 6. maí 1913 í Hjálmholti í Vestmannaeyjum og lést 15. janúar 1988. Foreldar hans voru Guðjónía Pálsdóttir og Ingibergur Hannesson. Árið 1941 kvæntist hann Maren Guðjónsdóttur. Fyrst var heimili þeirra að Sætúni við Bakkastíg 10 og síðar á Ásavegi 23. Þau eignuðust ekki börn, en tóku kjörson sem heitir Gunnar Reynir.

Árið 1946 keypti hann 55 tonna bát frá Svíþjóð sem hann, ásamt bróður sínum, gaf nafnið Reynir VE-15. Þennan bát áttu bræðurnir til 1966 þegar þeir seldu hann til Þorlákshafnar. Þegar Páll hætti á sjónum hafði hann verið sjómaður í 45 ár, þar af skipstjóri í 37 ár. Hann keypti þá lítið fyrirtæki, Selloplast, sem framleiðir sellofonpoka.

Óskar Kárason samdi formannavísu um Guðmund:

Ingibergi borinn Páll
bylgjur Reynir leiðir.
Þó að særinn svelli háll,
seggur þolinn veiðir.

Óskar samdi seinna aðra vísu um hann:

Þorinn Páll Bergi borinn
beinir á sæinn Reyni,
ill þó að flæða fylli
fallandi þiljur allar.
Dorgar á djúpa-torgi
drengur með hraustu mengi,
heldur svo heim að kveldi
hlaðinn með knörrinn, glaður.

Myndir


Heimildir

  • Friðrik Ásmundsson. Minningargrein um Pál Ingibergsson. Sjómannadagsblað Vestmannaeyja. 1989.
  • Óskar Kárason. Formannavísur. Vestmannaeyjum, 1950.
  • Óskar Kárason. Formannavísur II. Vestmannaeyjum, 1956.