Kanínur

Úr Heimaslóð, Sögusetri Vestmannaeyja
Stökkva á: flakk, leita
Kanína
Spendýr
Landdýr
Sjávarspendýr

Kanínur bárust líklega til Heimaeyjar sem gæludýr sem síðan var sleppt út í náttúruna og hafa náð að laga sig að aðstæðum. Sveiflur eru í stofninum en talið er að í honum séu um 2000 dýr. Mikill fjöldi hafði komið sér fyrir austan í Sæfjalli en var fækkað af meindýraeyði árið 2000. Útbreiðsla kanínu er víða s.s. í Nýjahrauni, á Haugum, allt í kringum Lyngfell og niður að fjöru í Víkinni og upp með Ofanleitishamri sem og um móa við flugvöllinn.

Kanínurnar eru grasætur og lifa á gróðrinum á eyjunni. Þær brýna tennur sínar á trjám með því að naga hringinn í kring um stofninn og drepa þannig tréð. Af þessum sökum er kanínan mikill skaðvaldur á Heimaey þar sem hún skemmir nýrækt og uppgræðslusvæði. Kanínan er einnig meinvaldur gagnvart öðrum lífverum og má þá nefna lundann en kanínur taka sér bólfestu í lundabyggð og hindra þannig aðgang lundans að henni. Í lundabyggðunum nagar hún einnig grasrætur sem hanga inni í holunum, veldur þannig skemmdum á gróðri og eykur hættu á skriðum. Dæmi um lundabyggð sem hefur orðið fyrir slíkum skakkaföllum er byggðin austan í Sæfjalli.