Jóhanna Guðný Helga Sveinsdóttir

Úr Heimaslóð, Sögusetri Vestmannaeyja
Fara í flakk Fara í leit

Jóhanna Guðný Helga Sveinsdóttir frá Löndum, síðar húsfreyja í Utah fæddist 9. febrúar 1861 á Löndum og lést 27. maí 1927.
Foreldrar hennar voru Sveinn Þórðarson beykir á Löndum, f. 18. febrúar 1827, d. 4. nóvember 1901 Vestanhafs, og kona hans Helga Árnadóttir húsfreyja, f. 6. júlí 1833, d. 15. febrúar 1907 í Vesturheimi.

Systkini hennar, sem lifðu, voru
1. Solveig Þórdís Jórunn Sveinsdóttir, f. 24. apríl 1858, d. 6. apríl 1920 Vestanhafs. Hún var kona Árna Árnasonar yngri frá Vilborgarstöðum, sem fór Vestur.
2. Jón Júlíus Sveinsson, bar eftirnafnið Thorderson Vestanhafs, f. 1. desember 1872, d. 24. maí 1951. Hann fór til Utah með foreldrum sínum 1878.

Jóhanna var með foreldrum sínum á Löndum, uns þau fluttust til Vesturheims 1878, var hjá Solveigu systur sinni á Löndum 1879, vinnukona í Stakkagerði 1880 og fór þaðan Vestur 1881.
Samkv. Our Pioneer Heritage greiddi eldri maður far Jóhönnu vestur og þau giftust. Sá var Samúel Bjarnason mormónaprestur. Jóhanna skildi síðan við hann og giftist James Peter.
Þau fluttust frá Spanish Fork til Cleveland í Emery héraði í Utah 1889, fluttust til Scofield 1896 þar sem James stofnaði trésmíðaverkstæði, en vann síðan við námugröft . Hann varð fyrir alvarlegu slysi haustið 1899, sem gerði hann nánast öryrkja . Eftir það var Jóhanna fyrirvinna fjölskyldunnar um hríð og stundaði og kenndi sauma. Auk þess hjálpuðu eldri börnin við framfærsluna.
Þau fluttust í nágrenni foreldra hennar 1902 og keyptu þar búgarð. Eldur eyðilagði hlöður og drap búpening þeirra, og nokkru síðar sama ár misstu þau 3 barna sinna í barnaveikifaraldri.
Árið 1905 fluttust þau til Sunnyside í Utah þar sem James fékk vinnu við trésmíðar, en fluttu aftur til Cleveland 1908 og stunduðu sveitarbúskap.
1917, í styrjöldinni 1914-1918 varð Jóhanna formaður Rauða Krossnefndarinnar í héraðinu og stýrði verkum.
Vegna heilsubrests James brugðu þau sveitarbúskap 1920, leigðu jarnæðið og fluttust í bæinn.
Maður hennar lést 1926 og Jóhanna 1927, bæði úr krabbameini.

I. Fyrri maður Jóhönnu, (1. desember 1881), var Samúel Bjarnason mormónaprestur. Hún var 4. kona hans. Hún skildi við hann.

II. Síðari maður Jóhönnu, (í febrúar 1884), var James Peter Johnson smiður og bóndi af dönskum ættum, d. 7. nóvember 1926.
Meðal barna þeirra voru:
1. James Theodore Johnson, f. 9. ágúst 1884. Kona hans, (1906), var Elzina Sophia Larsen.
2. Helga Maria Johnson, f. 13. janúar 1886. Maður hennar, (1906), var William D. Stokes.
3. Lawrence Johnson, f. 13. desember 1888, d. úr barnaveiki 14. desmber 1902.
4. Alice Laurence Johnson, f. 14. september 1891. Maður hennar, (1909), var David Timothy.
5. Mary Perley Johnson, f. 28. desember 1893, d. úr barnaveiki 9. desember 1902.
6. Emma Solveig kennari, f. 17. nóvember 1895.
7. Annie Matilda Johnson, f. 28. maí 1898, d. 12. ágúst 1899 úr berkjubólgu.
8. Eunice Ada Johnson, f. 13. júní 1900, d. úr barnaveiki 12. nóvember 1902.
9. Vera Josephine Johnson kennari, f. 11. febrúar 1904. Maður hennar, (1924), var Earl Cline.
10. John Earl Johnson, f. 7. desember 1906.


Heimildir

  • Samantekt: Víglundur Þór Þorsteinsson.
  • Manntöl.
  • Our Pioneer Heritage Vol. 7. Kate B. Carter. Daughters of Utah Pioneers. Salt Lake City 1964.
  • Prestþjónustubækur.
  • The Icelanders in Utah. La Nora Allred
  • Úr gögnum Kára Bjarnasonar og Fred Woods. References 1. Helga og Sveinn, 2. Sveinsdóttir.
  • Vesturfaraskrá 1870-1914. Júníus H. Kristinsson. Sagnfræðistofnun Háskóla Íslands 1983.


Þessi grein tilheyrir Æviskrám Eyjafólks eftir Víglund Þór Þorsteinsson.