Guðmundur Tómasson (Bergstöðum)

Úr Heimaslóð, Sögusetri Vestmannaeyja
(Endurbeint frá Guðmundur Tómasson)
Stökkva á: flakk, leita

Guðmundur Tómasson, Bergsstöðum fæddist í Landeyjum þann 24. júní 1886 og lést 12. október 1967. Guðmundur byrjaði ungur sjómennsku og var á fyrstu mótorbátunum eins og á Ingólfi með Guðjóni Jónssyni á Sandfelli og fleiri bátum. Formennsku byrjaði Guðmundur árið 1912 á Víking. Síðan tók hann við Marz og var með hann til ársins 1921. Eftir það var Guðmundur með hina ýmsu báta næstu áratugina á eftir. Hann var á sjó í rúmlega 60 ár og þar af formaður í 50 ár.

Óskar Kárason samdi formannavísu um Guðmund:

Gvendur traustur Tómasson
telur margan róður.
Ennþá girnist afla von
arkar stjórinn góður.

Heimildir

  • Sjómannablaðið Víkingur. Farmanna- og Fiskimannasamband Íslands.

Frekari umfjöllun

Guðmundur Tómasson skipstjóri, útgerðarmaður á Bergstöðum fæddist 24. júní 1886 í Gerðum í Landeyjum og lést 12. október 1967.
Foreldrar hans voru Tómas Jónsson bóndi, f. 2. júní 1847 í Fljótshlíð, d. 11. október 1945, og kona hans Þórhildur Ólafsdóttir húsfreyja, f. 9. september 1857 í Gerðum, d. 16. apríl 1949.

Guðmundur var með foreldrum sínum á Arnarhóli í V-Landeyjum 1901 og 1910.
Hann hóf sjómennsku með föður sínum við Landeyjasand 13 ára, varð fullgildur háseti á áraskipi 16 ára.
Hann stundaði vertíðir í Eyjum upp úr aldamótum, fyrst á vélbát 1907, á mb Ingólfi VE 108 1912.
Guðmundur varð skipstjóri á mb. Víkingi VE 133 1912 og í fjölda vertíða.
Skipstjóri var hann á mb Mars VE 143, einnig var hann lengi með Höfrung, sem hann átti. Hann var skipstjóri fram yfir 1960, í full 50 ár.
Guðmundur fluttist til Eyja 1916 og bjó í Frydendal með Jónínu við giftingu þeirra á því ári. Þau bjuggu á Hól 1917 og enn 1919, er Jónína lést eftir barneign og barnið nokkrum vikum síðar.
Hann bjó enn á Hól 1920, í Tungu við Heimagötu við síðari giftingu 1922, á Reyni 1924, á Þorvaldseyri 1926, í Landlyst 1927 og enn 1930, á Þingvöllum 1934 og enn 1937, á Sólbergi við Brekastíg 3 1940, Bergstöðum 1945 og enn við andlát 1967. Elín bjó enn á Bergstöðum við Gos 1973. Hún lést 1978.

I. Fyrri kona Guðmundar, (27. desember 1916), var Jónína Margrét Jónsdóttir, f. 26. ágúst 1893 í Snotru í A-Landeyjum, d. 10. maí 1919 á Hól.
Barn þeirra var
1. Jón Guðmundsson, f. 20. apríl 1919 á Hól, d. 16. júlí 1919.

II. Síðari kona Guðmundar, (27. janúar 1922), var Elín Jóhanna Sigurðardóttir, f. 5. júní 1901 á Seyðisfirði, d. 10. október 1978.
Börn þeirra voru:
2. Óskar Jóhann Guðmundsson sjómaður, vélstjóri í Reykjavík, f. 15. janúar 1924 á Reyni, d. 24. mars 1995.
3. Tómas Þórhallur Guðmundsson rafvirkjameistari í Ólafsvík, f. 9. júní 1926 á Þorvaldseyri, d. 21. janúar 2004.
4. Guðjón Ólafur Guðmundsson skipstjóri, útgerðarmaður í Eyjum, f. 1. nóvember 1927 í Landlyst, d. 24. desember 1975.
5. Hjördís Kristín Guðmundsdóttir talsímakona, f. 30. júní 1931 í Landlyst.
6. Sigurður Guðmundsson, f. 5. október 1932 í Landlyst, d. 21. júlí 1937 á Þingvöllum.


Heimildir


Þessi grein tilheyrir Æviskrám Eyjafólks eftir Víglund Þór Þorsteinsson.