Elín Þorsteinsdóttir (Löndum)

Úr Heimaslóð, Sögusetri Vestmannaeyja
Fara í flakk Fara í leit

Elín Þorsteinsdóttir húsfreyja á Vestri-Löndum fæddist 3. janúar 1882 á Dyrhólum í Mýrdal og lést 28. júní 1978 í Reykjavík, en var jarðsett í Eyjum.
Foreldrar hennar voru Þorsteinn Hjörtur Árnason, f. 24. ágúst 1847 í Dyrhólasókn í Mýrdal, d. 10. nóvember 1914 í Eyjum og kona hans Matthildur Guðmundsdóttir húsfreyja og ljósmóðir, f. 15. ágúst 1847 að Prestbakkakoti, d. 14. febrúar 1937 í Eyjum.

Elín var með foreldrum sínum til ársins 1904, en þá fluttist hún til Eyja og giftist það ár.

Þau Friðrik bjuggu í fyrstu í Kornhól, fluttust þá að Görðum og þar fæddust tvö elstu börn þeirra.
Þau byggðu nýtt hús að Löndum 1909. Hús það var stærra en almennt gerðist í Eyjum á þeim tímum. Á skýrslu 1910 eru þar 8 herbergi.
Hús útgerðarmanna þá voru að sumu leyti ætluð til að hýsa aðkomufólk, sem vann við útgerðina, landmenn, sjómenn og þjónustufólk. Það reyndi því líka á húsfreyjurnar, sem stjórnuðu heimilishaldinu. Elín þótti sérlega vel fallin til stjórnar og skipulags og húsbragur þótti með afbrigðum glæstur.
Þau hýstu þar foreldra Elínar og Svipmund Ólafsson föður Friðriks.
Á Löndum bjuggu hjónin við manntal 1910 og síðan allan sinn búskap. Elín fluttist til Reykjavíkur til Sigríðar dóttur sinnar síðla ævinnar, en síðustu 10 árin dvaldi hún á Hrafnistu þar.

ctr


Hjónin á Löndum, Elín Þorsteinsdóttir, Friðrik Svipmundsson, og börn. Frá vinstri: Matthildur Friðriksdóttir, Ásmundur Friðriksson, Sigríður Friðriksdóttir og Þórunn Friðriksdóttir situr á hné föður síns.


Maður Elínar (1904) var Friðrik Svipmundsson útgerðarmaður, f. 15. apríl 1871, d. 3. júlí 1935.
Börn Elínar og Friðriks:
1. Matthildur Friðriksdóttir, f. 26. desember 1907 að Görðum, lengst af húsmóðir í Kanada.
2. Ásmundur Karl Friðriksson skipstjóri, framkvæmdastjóri, f. 31. ágúst 1909 að Görðum, d. 17. nóvember 1963.
3. Sigríður Halla Friðriksdóttir húsfreyja í Reykjavík, f. 23. júní 1914, d. 25. júní 1995. Maður hennar Hjalti Árnason.
4. Þórunn Friðriksdóttir, f. 9. júní 1922, d. 14. janúar 1939. (Sjá Blik 1939, 4. tbl.: Minningarorð um Þórunni Friðriksdóttur frá Löndum).
5. Þorsteinn Hjörtur Friðriksson, f. 4. ágúst 1918, d. 26. maí 1921.
Fósturbörn Elínar og Friðriks voru:
6. Árni Ólafsson Svipmundssonar bróðursonur Friðriks, f. 18. janúar 1896, fórst með mb. Adólf 3. mars 1918.
7. Guðrún Jóhannesdóttir.
.


Heimildir


Þessi grein tilheyrir Æviskrám Eyjafólks eftir Víglund Þór Þorsteinsson.