Blik 1955/Kveðja til Gagnfræðaskólans

Efnisyfirlit 1955

KVEÐJA

til Gagnfræðaskólans í Vestmannaeyjum

1. des. 1954

frá TRAUSTA ÞORSTEINSSYNI

Leitar hugur óðfús einatt

ykkar til, en þó í dag

flýtir hann sér hraðar, hraðar

heiman, því með gleðibrag

veit, að öll þið safnizt saman

til söngs og leikja, hver og einn;

gleðielda kveikja, kynda

kennari og lærisveinn.

Áður fyrri ykkar meðal

átti ég náms- og gleðistund,

sakna nú að orka eigi

að eiga þátt í slíkum fund.

Bjarmar þó af björtum morgni

batans, senn mun eflast þor.

Feginn væri, ef gæti gengið

gleðinnar og námsins spor.

Sendi ég ykkur öllum, öllum

óska minna blómavönd;

lítil reynist orðsins angan

æskumanns, sem reyra bönd.

En þessi litli ljóðavöndur

með lítinn ilm, — af skrúði fár,

þakkir flytur ykkur einnig

öllum fyrir liðin ár.

Megi þessi stofnun standa

styrkum fótum, björt og hrein,

veita gnægð af góðum ráðum,

göfga, þroska mey og svein,

Heill í dag og heill í framtíð,

heill á náms og gleðistund;

menntakyndill megi bjartur

mörgum lýsa á gæfufund.

Björk

Trausti Þorsteinsson Steinssonar vélsmíðameistara hafði stundað nám í skólanum tvo vetur. Hugðist hann ljúka 2. bekkjar prófi í fyrra vor.
Í aprílmánuði í fyrra, er nemendur fengu tóm til vinnu við framleiðslustörfin í bænum, slasaðist Trausti, og hefir hann átt í þeim meiðslum síðan.
Skólastjóri og kennarar Gagnfræðaskólans senda Trausta alúðarfyllstu þakkir fyrir hlýju kveðjuna og óska þess jafnframt, að Trausti geti sem fyrst setzt á námsbekk í skólanum aftur.
Bezta eign hvers skóla eru góðir nemendur. Trausti var einn af þeim, hlýr og háttprúður.